Тут, на гэтым полі, урочышча Ліпкі, сяголета расце авёс, 42 гектары, расказвае дырэктар РАПТЗ Валянцін Шостак, які таксама прыехаў сюды паглядзець ход работ. На ўборцы заняты тры камбайны, тры камбайнеры: Сяргей Зімаеў, Аляксандр Рудзько і Юрый Кажаронак. Працуюць яны зладжана, дружна, старанна, да работы ставяцца адказна, адзначае кіраўнік. Адвозяць збожжа ад камбайнаў Леанід Палазняк і Анатоль Ахрэмчык (гэта свае вадзіцелі), дапамагае ім Уладзімір Жораў.
У гаспадарцы на дзень нашага прыезду ўжо ўбралі 830 гектараў зерневых і зернебабовых культур з 1053 планавых. «Зжалі азімы і яравы ячмень, зернебабовыя культуры, зараз працуем па аўсу, застаюцца невялікія плошчы азімага і яравога трыцікале, усяго прыкладна 220 гектараў. З убраных культур большую ўраджайнасць сяголета даў азімы ячмень, 21 цэнтнер з гектара, увогуле ж два месяцы засухі на ўраджайнасці сказаліся адмоўна», — са шкадаваннем заўважае Валянцін Шостак.
А вось жніву надвор’е спрыяе. Гэта разумеюць механізатары, таму такой ва ўсіх сэнсах гарачай парой з уласным часам не лічацца, працуюць па дванаццаць-трынаццаць гадзін, да васьмі-дзевяці вечара. На мехдвары яны ўжо а сёмай раніцы: за той час, пакуль спадзе раса, трэба дагледзець, падрыхтаваць камбайн, каб у полі работа ішла гладка, каб не было прастояў. За дзень на аўсе можна намалаціць сем-восем бункераў, расказваюць яны. Калі бункер напаўняецца збожжам, заўсёды радасна, і працуецца тады з большай ахвотай.
А пакуль мы размаўлялі, мужчыны з ахвотай сілкаваліся гарачым абедам, на першае быў расольнік з мясам, на другое каша (дарэчы, аўсяная) з катлетай, хлеб, батон і кісель. Елі і нахвальвалі: спажыўны абед, смачны. Думаецца, такая пахвала, падмацаваная чыстымі талеркамі, для старшага повара Наталлі Гірусавай, у гэты дзень менавіта яна прывезла абед у поле, была прыемнай. Разам з поварам Тамарай Сташэўскай і кухоннай рабочай Марыяй Пацай яны зараз вараць на 30–40 чалавек штодня, кормяць усіх, хто заняты на палявых работах. Што ні кажы, а справа гэта і няпростая, і адказная — карміць тых, хто працуе на харчовую бяспеку краіны.
P.S. Згодна са зводкай упраўлення па сельскай гаспадарцы і харчаванні, у Глускім райаграпрамтэхзабеспячэнні на раніцу 24 жніўня зерневыя і зернебабовыя ўбраны амаль поўнасцю, пры ўраджайнасці 17,1 цэнтнера з гектара намалочана 1759 тон збожжа.
Фото — Кіраўнік РАПТЗ Валянцін Шостак (справа) з механізатарамі Аляксандрам Рудзько, Юрыем Кажаронкам, Сяргеем Зімаевым
Таццяна ЛУКАШЭВІЧ
Фота Кацярыны СОСІКАВАЙ