Ужо 14 гадоў Завалочыцкім сельскім Домам культуры загадвае Людміла Навіцкая. Да гэтага яна працавала выхавацелем дзіцячага садка, у культуры, прызнаецца, трапіла выпадкова.
https://www.glusk.gov.by/news/news-raion-ru/item/5701-dobry-nastroj-vyasko-tsam-ad-kalektyvu-zavalochytskaga-sdk#sigProId326d308d30
У 2011 годзе былая загадчыца клуба ў Завалочыцах Таццяна Іванаўна Дубашынская (дарэчы, спецыяліст з саракагадовым стажам) прапанавала ёй стаць кіраўніком сельскай установы культуры. «Да творчасці мяне цягнула з дзяцінства, заўсёды была ўдзельніцай школьных канцэртаў, пастановак, — расказала мая суразмоўца. — Мабыць, таму і згадзілася, адразу захапілася справай і другіх ёю захапіла, хутка зразумела — гэта маё!»
Кіраўнік культурнай установы аб’яднала вакол сябе таленавітых калег, з такім жа душэўным запалам, энтузіязмам, натхненнем, жаданнем працаваць з людзьмі і для людзей. Разам з Людмілай Навіцкай працуюць культарганізатар Таццяна Міроненка, кіраўнік народнага калектыву Вольга Фешчанка, тэхнічны работнік Святлана Студнева, дарэчы, яна не толькі адказвае за парадак і чысціню ў памяшканнях, але, калі трэба, з радасцю пераўвасабляецца ў артыстку і выходзіць на сцэну. Разам завалочыцкія культработнікі ладзяць канцэрты ў любыя святы, гульні, дыскатэкі, выстаўкі, вечары адпачынку, арганізуюць экскурсіі... Сёння ў Завалочыцкім СДК працуюць 11 клубных фарміраванняў, кірункі розныя — ад экалагічных да спартыўных. Дзеці і падлеткі развучваюць танцы, вучацца спяваць, майструюць падзелкі да свят, займаюцца спортам (на другім паверсе СДК ёсць трэнажорная зала), удзельнічаюць у экскурсіях. Для дарослых існуюць драматычны, спартыўны гурткі, ансамбль народнай песні «Вяночак». Дарэчы, не магла не адзначыць Людміла Навіцкая аднаго з яго ўдзельнікаў — Рамана Акінчыца. «Чалавек ён вельмі таленавіты, актыўны, добра спявае, — ахарактарызавала яго мая суразмоўца. — Рома жыве ў Мінску, часта прыязджае ў Завалочыцы, тут у яго сваякі, выступае разам з намі на канцэртах».
Асаблівую ўвагу, як вядома, культработнікі аддаюць пажылым людзям. Для іх на базе СДК існуе клуб «Залатыя гады». «Людзі сталага ўзросту разам збіраюцца, спяваюць, танчаць, удзельнічаюць у конкурсах, дзеляцца апошнімі навінамі і падзеямі, — працягвае Людміла Навіцкая. — Падобныя сустрэчы заўсёды атрымліваюцца вельмі шчырымі і цёплымі. Такой была і апошняя сустрэча: напярэдадні Новага года быў арганізаваны вечар у стылі рэтра „Навагоднія прыгоды“. Акрамя таго, віншуем са святамі пажылых па месцы іх жыхарства, ушаноўваем сямейныя пары-юбіляры».
Не могуць сядзець склаўшы рукі культработнікі Завалочыцкага СДК. У калектыву шмат ідэй, адна з іх — правесці ў аграгарадку «Яблычны фэст», зрабіць мерапрыемства брэндавым, традыцыйным, з песнямі і танцамі, конкурсамі, яблычнымі стравамі. Ёсць і іншыя задумкі ў сельскіх культработнікаў, расказваць пра іх пакуль не будзем. Упэўнена, што іх абавязкова ўвасобяць у жыццё, яны будуць не менш цікавымі і парадуюць вяскоўцаў. Для гэтага і працуе калектыў Завалочыцкага сельскага Дома культуры.
Г. АЎТУХОВА
Фота аўтара і з архіва СДК