На гэты раз свята яны арганізавалі і наладзілі для сябе, для сваіх педагогаў і бацькоў і разам са сваімі педагогамі і бацькамі. У Цэнтры культуры і вольнага часу «Арыён» 20 мая адбыўся справаздачны канцэрт Глускай дзіцячай школы мастацтваў імя Валерыя Іванова. У фае кінатэатра — выстава карцін, работ вучняў аддзялення выяўленчага мастацтва, на сцэне — самі музыкі, танцоры спевакі, ад самых маленькіх (падрыхтоўчага аддзялення) да выпускнікоў, сяголетніх і мінулагодніх, у глядзельнай зале — іх бацькі, бабулі і дзядулі, сваякі і блізкія, хто захацеў падтрымаць сваіх дзяцей, пабачыць, парадавацца за іх і разам з імі. Забягаючы наперад, скажу, што імпрэза (язык не паварочваецца назваць гэта мерапрыемствам) была арганізавана на вышэйшым узроўні. Канцэртная праграма — разнастайная і цікавая: скрыпка, флейта, фартэпіяна, ансамблі гітарыстаў і цымбалістаў, спевакоў і танцораў. Нумары — ад сур’ёзных грамадзянска-патрыятычных да жартоўных і лірычных, класіка і сучаснасць.

Вельмі важнай і ўрачыстай часткай справаздачнага канцэрта стала цырымонія ўручэння атэстатаў выпускнікам школы мастацтваў. Іх сяголета 12: 5 скончылі музычнае аддзяленне і 7 харэаграфічнае, гэта Ян Меснік, Лізавета Серык, Анастасія Арцюшэня, Лізавета Навічонак і Карына Прыгара, Ева Барсукова, Соф’я Камоцкая, Дар’я Краўчанка, Аляксандра Лявонцьева, Ніколь Радвіновіч, Ульяна Рудабелец і Соф’я Смольская.

За гады навучання педагогі, дзеці і іх бацькі прывыклі адзін да аднаго і нават пасябравалі, вось чаму ў прагучаўшых выступленнях (некаторыя былі скрозь слёзы) — шчырасць, прыязнасць, падзяка, слушныя парады на далейшую дарогу, на доўгае жыццё, пажаданні захоўваць творчасць у душы, несці яе людзям. Атэстаты аб заканчэнні школы мастацтваў выпускнікі атрымалі з рук загадчыцы сектара культуры Глускага райвыканкама Аліны Хлістуновай, Дыплом 1-й ступені раённага этапу абласнога праекта «Мастацтву кіно прысвячаецца» (намінацыя «Мая афіша») Аліна Аляксандраўна ўручыла педагогу выяўленчага мастацтва Вользе Сокал, Падзяку сектара культуры — вучаніцы па класе фартэпіяна Соф’і Крамянецкай, за актыўны ўдзел у канцэртнай і конкурснай дзейнасці.

Дырэктар школы мастацтваў Марына Рудабелец за імкненне да ведаў, працавітасць, адказнасць і актыўны ўдзел у жыцці школы адзначыла выпускніцу-выдатніцу Соф’ю Камоцкую. уручыла дырэктар Падзякі і бацькам, за актыўную падтрымку і дапамогу школе іх атрымалі Алена Пацалуева, Юлія Паўлава, Соф’я Меснік, Андрэй Леўчанка, Ірына Барсукова. Падзякавала Марына Леанідаўна і тым сваім выпускнікам, хто раней ужо скончыў школу, але прадаўжае выступаць разам з цяперашнімі вучнямі, удзельнічаць у разнастайных мерапрыемствах, гэта Ягор Лось, Паліна Сарока, Анастасія Шах, Валерыя Чэбан, Ксенія Падбярозкіна, Дзмітрый Баскаулаў.

Словы падзякі школе мастацтваў і яе педагогам гаварылі бацькі выпускнікоў і самі выпускнікі, гаварылі шчыра і ўсхвалявана, дзякавалі за тое, што ўкладвалі веды і душу, вучылі і выхоўвалі, настаўнікам жадалі новых здольных і творчых вучняў, а школе — далейшага развіцця і новых дасягненняў. Дарэчы, гэты год для дзіцячай школы мастацтваў асаблівы, сяголета ўстанове спаўняецца 65 гадоў, і тут ужо думаюць над святкаваннем юбілейнай даты.

Ну а на гэтым справаздачным канцэрце на сцэну выходзяць усе яго ўдзельнікі: няўрымслівыя і энергічныя вучні, творчыя педагогі-прафесіяналы, тыя, дзякуючы каму жыве і працуе школа, Глуская дзіцячая школа мастацтваў. Заключны выхад быў таксама гучны, яркі, прыгожы.

Т. ЛУКАШЭВІЧ, фота аўтара