Досыць, досыць жыту ў полі стаяць,
Пара па ядроным жыце камбайнам гуляць,
Пара ядронае жыта ў засек засыпаць.

У Глускім раёне, шануючы і прадаўжаючы традыцыі продкаў, правялі «Зажынкі». Месцам правядзення свята стала ячменнае поле эксперыментальнай базы «Глуск», а яго ўдзельнікамі — кіраўніцтва раёна, кіраўнікі і спецыялісты мясцовых гаспадарак і прадпрыемстваў, упраўлення па сельскай гаспадарцы і харчаванні. Але галоўныя пажаданні і галоўныя словы былі звернуты да механізатараў, экіпажаў зернеўборачных камбайнаў, а ў іх асобе — да ўсіх, хто сяголета будзе ўдзельнічаць у жніве. На свяце былі Сяргей і Дар’я Прыбыш, Іван і Арцём Арцёмчыкі, Аляксандр Казакевіч і Максім Насановіч, Аляксандр Дарошка, механізатар Сяргей Насановіч (ён заняты на цюкаванні саломы). Будзе на ўборцы ў эксбазе «Глуск» і яшчэ адзін экіпаж — Валерый і Анжаліка Навічонак (бацька з дачкой).

Лёгка не будзе, бо надвор’е, як і заўсёды апошнім часам, уносіць у работу аграрыяў свае карэктывы, сказаў, звяртаючыся да ўдзельнікаў свята, старшыня райвыканкама

Аляксей Жураўлёў, але ён перакананы, што прафесіяналізм і адданасць сельскай гаспадарцы дапамогуць хлебаробам дабіцца высокіх паказчыкаў. Кіраўнік раёна падкрэсліў, што важна не толькі ўбраць вырашчанае, важна зберагчы кожнае зярнятка.

Ён падзякаваў і мясцовым прадпрыемствам, што не застаюцца ўбаку, а заўсёды падтрымліваюць аграрыяў у гарачую пару жніва, наш раён сельскагаспадарчы, і мы ўсе зацікаўлены ў рабоце гэтай галіны, бо яна рухавік развіцця ўсяго раёна. Аляксей Жураўлёў пажадаў усім высокіх вынікаў у працы, светлага неба і добрага надвор’я.

Малітву над зернем новага ўраджаю прачытаў благачынны Глускай акругі протаіерэй Міхаіл, асвяціў людзей і тэхніку.

І вось жнейкі ў нацыянальных строях выходзяць пад звонкую песню на ўскраек поля і вострымі сярпамі жнуць першы, зажыначны, сноп — снапок красны, як месячык ясны! Падносяць яго кіраўніку раёна: «Кідай, гаспадар, высока, няхай відаць будзе здалёка! На добрае надвор’е! На здароўе! На багаты ўраджай!»

Камбайнеры ідуць да камбайнаў, заводзяць рухавікі, тэхніка выходзіць у поле. Жніво пачалося!

Сяголета ў эксперыментальнай базе «Глуск» да ўборкі 438 гектараў азімага ячменю, 170 гектараў азімага трыцікале, 180 гектараў азімага жыта, 100 гектараў азімага рапсу, 133 гектары яравога ячменю, 440 гектараў зернебабовых культур і 362 гектары аўса. На жніве будуць задзейнічаны пяць зернеўборачных камбайнаў. Зараз убіраюць азімы ячмень, на чарзе — рапс. Усяго па Глускім раёне ў гэтым годзе патрэбна ўбраць 8802 гектары зерневых і зернебабовых культур (акрамя кукурузы і проса).

Т. ЛУГАВАЯ
Фота А. ЗМІТРОВІЧ